२४ लाख लाडक्या बहिणींचे लाभ थांबले; ई-केवायसी दरम्यान एकाच प्रश्नामुळे गोंधळ, तुम्हीही ही चूक केली का?
लाडकी बहीण योजना ई-केवायसी त्रुटी: राज्यात २४ लाख 'लाडक्या बहिणींचे' लाभ थांबवण्यात आले आहेत. ई-केवायसी प्रक्रियेदरम्यान एकाच प्रश्नामुळे ही समस्या निर्माण झाल्याचे समोर आले आहे.
लाखो महिलांसाठी लाडकी बहीण योजनेचे लाभ थांबले
लाभ थांबल्याने लाभार्थी महिला आक्रमक
ई-केवायसी दरम्यान झालेल्या चुकीमुळे लाभ थांबल्याचा दावा
लाडकी बहीण योजना ई-केवायसी: महायुती सरकारसाठी गेमचेंजर ठरलेल्या लाडकी बहीण योजनेचे लाभ लाखो महिलांसाठी थांबले आहेत. दरमहा त्यांच्या बँक खात्यात जमा होणारे १५०० रुपये थांबल्याने महिलांमध्ये नाराजी पसरली आहे. ई-केवायसी प्रक्रियेदरम्यान झालेल्या एका चुकीमुळे महिलांना लाभांपासून वंचित राहावे लागत आहे. अर्ज भरताना झालेली चूक सुधारण्यासाठी सरकारने प्रयत्न सुरू केले आहेत.
माध्यमांच्या वृत्तानुसार, महिला आणि बालविकास विभागाच्या वरिष्ठ अधिकाऱ्यांनी दिलेल्या माहितीनुसार, ई-केवायसी फॉर्म भरताना एकाच प्रश्नामुळे अनेकांचा गोंधळ झाल्याचे समोर आले आहे. फॉर्ममध्ये सरकारी नोकरीबद्दल एक प्रश्न विचारण्यात आला होता. यामुळेच अनेकांचे लाभ थांबले आहेत. फॉर्ममध्ये विचारलेला प्रश्न होता, 'तुमच्या कुटुंबात कोणी सरकारी नोकरीत नाही ना?'
फॉर्ममध्ये विचारलेल्या या प्रश्नामुळे अनेक महिला गोंधळल्याचे सांगितले जात आहे. या प्रश्नाचे उत्तर देताना अनेकांनी 'नाही' ऐवजी 'होय' या पर्यायावर टिक केल्याचे समोर येत आहे. या प्रश्नाच्या उत्तरामुळे, अनेक लाभार्थी महिलांच्या कुटुंबात सरकारी कर्मचारी असल्याचे सिस्टीमने गृहीत धरले. याच कारणामुळे तब्बल २४ लाख महिलांचे लाभ थांबवण्यात आल्याची चर्चा आहे.
महिला आणि बालविकास विभागाच्या आकडेवारीनुसार, २४ लाख महिलांनी त्यांच्या कुटुंबात सरकारी कर्मचारी असल्याचे सांगितले आहे. मात्र, महाराष्ट्रात सरकारी आणि निमसरकारी कर्मचाऱ्यांची संख्या ८ ते ९ लाखांच्या आसपास आहे. त्यामुळे या लाभार्थ्यांची संख्या कर्मचाऱ्यांच्या संख्येपेक्षा जास्त दिसत आहे. राज्यभरात योजनेचे हप्ते न मिळाल्याच्या तक्रारी वाढत आहेत. त्यामुळे सरकारने प्रत्यक्ष पडताळणी करण्याचा निर्णय घेतला आहे. राज्यात बहुतेक लाभार्थी महिलांच्या ई-केवायसीमध्ये त्रुटी आढळल्या आहेत. अंगणवाडी सेविका या महिलांना प्रत्यक्ष भेट देऊन त्यांच्या कागदपत्रांची पडताळणी करतील.
0 Comments